هذه القصيدة هي تحكي رحلة الشاعر التي بدأها

تــولّم يـا نـديبي مـن علـى مـفــتـولـة الـذرعـان = عـلـى الحُـرّ الشـهام الـلـي عـزايـمـهـا تـودّيـهـا
تـولـّـم لـلــسفـر يـوم الثــلاثـا من قـرى زهــران =و مـقيـالـك حـدود المـالكـية والــمسـا فيـــهــا
تبـي تـلـقـى بـنـي مـالك رجالٍ تـكـرم الضيفـان =مــواقيـف الشيـم بـيـن الـقـبـايـل مـا تخــلّيـهـا
ولا عدّيـت مـن وا دي بـوى في ديـرة الـثـقــفـان = تـعلَّـم فـي الديـار وكـل ديـرة باسـم اهـاليهـا
وابا الحارث من الصخرة ليا ميسان للحدبان = حلالٍ مرسية للجود دايم في مراسيها
شراكتنا حدادتنا ليا جا الخير والرُّجعان = ليا جا الخير لعتيبة وابا لحارث تواليها
ولا زليت ملك الحارثي في ديرة العتبان = تبي تلقى عتيبة بينة من غير اسميها
عتيبة من حدود الحارثية لا ورا الريعان = ومن جودا ليا اقصى نجد ماقدر كلها احصيها
لها في كل بلدة من بلاد المملكة عنوان = لها تاريخ يعرف باول الهجرة وتاليها
عتيبة لا بدا يوم عبوس يروّغ الاذهان = ليا حميت سموم القيظ توردها مناهيها
اسل عنها مطير وحرب والشجعان من قحطان = واسل عنها بني عثمان يوم الموت تسقيها
من اول يوم كل من ذراعه ينهل العطشان = مواقفها شهيرة للعرب من غير انا اطريها
وانا منزالي الدار التي روزه على الحدّان = اسل عن قرية خديد الذي مشهور طاريها
خديد من السراة ليا الصفاة ليا الذي في البان = لحافي لاعريت ولا بردت وماقدر اصخيها
سراة خديد تغنينا عن الطيب وعن رديان = ولا سيَّرت فيها زال همّك من مراويهـــا
وشد العزم واحذر لاتخلي بتلة الشجعان = نبي نمشي بلاد بني سعد نطوي ملاويها
من الدُّور الحُمر نسرح ونسبق سرحة الرعيان = نمر اولاد عبدل وزعتي والصدق بانيها
وحث الدرب لا تغوي دروب من اول الجدان = دروب ثبيت معروفه على العليا مراسيها
وتبدا بالدهامين القرايب واطيب الجيران = تقهوا عندهم واطلع لغب ماحسن مضاويها
وخلك مع طريقك واندرالوديان والجنبــان = وخذها من طرف واحذر تعدّى بعض اساميها
ترى فيها الذويبي والشهيب وجملة الثبتان = وكل ورثته تشهد ولا نقدر نخبيهــا
وعوّد للسلاقا في السحن مركاز للعربان = وبلغهم سلام الشاعر اللي ما يجافيها
ولاتنسى جماعتنا رفاقتنا من الربعان = ربيع اهل الشيم والجود ما تعرف شوانيها
وخلك مع بني زايد تراهم للوفا عنوان = ترى الزود على عهـد المراجل ما تواريها
وشد العزم لاتتعب ترانا في قرى بقران = تضيف عندهم تلقى الكرم دايم بواديها
ولا ودعتهم تاخذ يمين وتتجه شقصان = تبي تلقى جعيد اللي على البيضا مواضيها
تقهوى عندهم ياصاحبي من دلة السفطان = ولا تنسى الجميعي والحصيني ذل غازيهـا
ولا تبعد بلاد عتيبة اكبر من حمى السلطان = وحدك لاتعدى فارض يا ما كثر نواحيها
وعوّد فوق مركوب تعب من كثرة الوديان = عليه الفارس اللي ما يتعتع في مناحيها
وحنا نحمد الله ردنا في ذا الزمان اخوان = وشرفنا بفيصل راعي الامة وحاميها
وانا وان كنت اغني خاطري من هجرته تعبان = من علوم نشاهدها ومحتار النظر فيهــا
وحنا نحمد الله ماش لا داين ولا مدَّان = ولا نخبر جروحٍ بيننا يتعب مداويها
وحنا لو صبرنا واجتبرنا نردع الغلطان = ولا حنا غشم نقدر مسايلنا نسويها
ليا منا اتفقنا والتزمنا للشيم سنــدان = لنا عادة ليا ناديتها يفرح مناديها
وقل لشيوخهم ماينفر الطاير بلا جنحان = ولا مسئول عن شغل الرعية غير راعيها
وقل للي معه في خاطره ظنه على الشيخان = الاول قال بئس القوم لا كرهت قواديها
نبي كل يقوم وينتصب و بدبرة الرحمان = ونبني بنيةٍ تصلح لقاصيها ودانيهــا
ونختمها بذكر اللي عليم ومطلع بالشان = ويعلم وش بقي للخلق من جملــة لياليهــا

[img]http://www.s3udy.net/pic/thankyou002_files/10.gif[/img]


[img]http://www.s3udy.net/pic/thankyou002_files/11.gif[/img]


[img]http://www.s3udy.net/pic/thankyou002_files/12.gif[/img]

[img]http://www.s3udy.net/pic/thankyou002_files/13.gif[/img]

[color:795c=red][color:795c=#000000][img]http://www.s3udy.net/pic/thankyou002_files/14.gif[/img][/color] [/color]
_________________