يا لله يا للي للمخاليق مزبان = لطفك علينا يا عليم بقضاها
يا مدرج افلاك الليالي والازمان = كوّنت مبداها ومنك انتهاها
تعيضنا بالصّبر يا رب الاكوان = وترحم فقيدٍ عدّ ما هلّ ماها
وتجعل له الجنة مقرٍّ ومسكان = وتغفر له الزلات عفوك كفاها
نهار فيصل مات عمتنا الاحزان =مصيبةٍ عمّت علينا بلاها
ضجّت لها الأصوات شيبٍ وشبان = لو ينفدي بالروح نعطي فداها
ارتجت الوديان يوم الخبربان = وجبالها مالت وطاحت حصاها
يوم الغدر محطوط في جيب غدران = بانت على الخاين رصاصة رماها
ما يدري المخبول وابليس فرحان = بالطلقة اللي قلب فيصل وداها
خاب العميل اللي رمى الفرد خرعان = وشلّت يمينه واليسار وقفاها
هذي جزاة اللي رفع شان الاوطان = حاكم بحكم الله ورافع بناها
ما مات من هو حط ساسٍ وبنيان = ورصّ الحصى مدماك يذري ذراها
وفتَّل علومه زود ما هي بنقصان = ومن فتَّل الزينات يلبس نباها
لا لوَّحَ الفيصل بيمناه له شان = والسيف شرع الله وسنّه حماها
تهتز له صنعا ويهتز الالمان = والروس والمصري ولندن وراها
ويهتز بحر الفرس وملوك طهران = والترك يوم الترك بلَّت لحاها
كلٍّ بعقله حاسب حساب سرحان = واقف على حدّه وعالم مداها
هيبة من الله والعطايا بميزان = سنّة محمد عزّت اللي نصاها
فيصل ولد نمرٍ وربّوه الاخوان = شارب من الحكمة وغطّى سقاها
يوم اجتمع فالوقت بايروطمعان = حَمّا المياسم لين عزز براها
وتالَ العرب فيهم عدوٍّ وصُدقان = واظهر علومٍ كان بيّن خفاها
وقرّت له الدنيا على كيف ماكان = والمملكة دايم على من عداها
وختامها صلّوا على ولْد عدنان = شفيعنا في يوم شبّت لظاها